#ParentLicenses1708

睇到近日發生嘅幾件事，總結唔少而家嘅父母教小朋友比較自我中心，唔理其他人感受，所以令而家啲父母相較以前啲人而言，就會俾人話唔識教

第一件事

有日我喺街等call車，見到狗主拖狗仔喺街散步；同時有對母子，個小朋友目測3, 4歲，見到隻狗狗好興奮尖叫，再衝埋去狗狗度

狗狗同狗主都冇理到就直行直過，而個小朋友就繼續追住隻狗。當狗仔停低痾尿嗰下，個小朋友突想伸手去摸，遂俾狗主嚴厲喝止：「唔好摸呀，咬你㗎！」

跟住個小朋友邊喊邊跑返去呀媽度，個呀媽就話：「使唔使咁大聲呀！？」

個狗主就話：「你又唔睇住個仔，我隻狗痾緊尿，佢走埋去摸呀，一陣整到你仔你實發癲」

第二件事

話說我屋苑有個必經閘口，每人每日出入都要經呢個閘口，而且個閘口係好窄，最多兩個人同時入或出，甚至於繁忙時間係必須要排隊出入

雖然閘口出入繁忙，但平時就算要排隊，不消1分鐘都可以入到去，然而有日係排咗成5分鐘，隊尾長到去天橋

當時我聽到前面啲人好大聲咁話：「抱佢入去啦，拉咗條長龍呀！」

有啲姐姐就話：「俾我哋入去先，你再慢慢教」

有啲發脾氣就話：「得你有仔呀！？我女等我返去食飯呀！啲外賣凍晒啦！」

之後我問保安，佢哋話：「有個家長拖住個小朋友（著BB鞋）一齊入閘，但小朋友唔敢跨過個門柵，呀爸堅持唔抱佢入，所以拉咗條龍」

我真係當場講咗句：「咁無聊！？可以喺第二度教或少人時教囉，阻人返屋企係咩教法！」

第三件事

大快活不嬲都係自己取餐，係見有行動不便或你特別要求先會送餐。今日放午飯時，我去等餐嘅時候，見到個妹妹想拎個餐，個妹妹係連張取餐枱都要踮高先勉強睇到啲餸

取餐枱姐姐同個妹妹講：「你拎唔到㗎啦，叫你父母拎啦，好重㗎」

個妹妹跑走咗一陣又跑返嚟話：「爸爸叫我自己拎」

姐姐：「好重㗎喎，你叫父母拎好啲，一陣倒瀉麻煩呀」

跟住個妹妹又跑走，今次個爸爸出現啦

爸爸埋到枱就話：「咁少嘢都拎唔到咩！？你拎可樂啦」

妹妹一拎杯可樂就跣手，成杯可樂飛落地下

爸爸第一時間投訴啲姐姐：「有冇搞錯呀！個可樂杯咁跣，點拎呀？你湛過杯俾佢啦！」

當刻啲可樂仲彈到個西裝友，個西裝友係連環爆粗

如果係我父母，佢哋會話我做咩唔拎好啲，同埋會著我同人講sorry，而唔係調返轉去投訴人！

人哋都叫咗你拎，唔好叫妹妹拎啦，個地你拖咩，咪又係姐姐拖！

讀者投稿@Sing