#ParentLicenses1381

話說前個排落大雨出唔到街，咁一見好天，我即刻帶咗我隻狗去寵物公園玩

寵物公園係有分大細狗區，我隻狗係poodle，所以自然帶佢去細狗區玩

玩咗差唔多5分鐘左右，突然有個媽媽拖住個啱啱識行嘅BB入嚟，係人類BB。咁本來都冇咩嘢，好多人都又養狗，又有小朋友，好平常

本來個媽媽係抱住BB坐喺櫈度，但當幾隻細狗跑來跑去時，BB好興奮尖叫，所以媽媽放咗佢落嚟，由得BB佢自己行

個BB行兩步就跌親大喊，然而媽媽無出手扶佢

大家狗主見狀都控制住狗狗唔好行入佢哋範圍，我諗大家同我一樣，驚狗狗玩得癲時嘅無情力會整親個BB

過咗好耐，媽媽同BB隻狗都未入嚟，個BB又成日追住啲狗玩。佢哋有啲就聞下個BB，但有隻柴犬用手推個BB，BB失平衡就跌倒又大喊

雖然個主人立即道歉同控制住隻柴犬，但個媽媽好嬲咁指住隻柴犬話：「你同我小心啲！」

事已至此，媽媽依然係冇抱走個BB。出於關心，我都上前問候下佢個小朋友有無事

小朋友媽媽話：「冇事，佢成日跌」

跟住我問：「你隻狗呢？咁耐都未見狗狗嘅？」

媽媽話：「我冇養狗，但BB鍾意狗，所以帶佢嚟寵物公園」

咁我同佢講：「要小心啲BB，因為狗狗難得出街，又係狗公園內，大家都唔上繩好正常，要小心狗狗玩得癲啲無情力」

跟住有個女人都話：「係呀，佢哋真係冇咩地方可以咁樣跑嚟跑去，所以要小心佢哋解放天性，睇住呀BB」

聽畢，個媽媽依然由得BB亂走，啲主人都盡量唔行佢哋個區域，但個BB成日都想去摸啲狗狗

有啲狗狗好奇咩人喺背後摸佢，就會擰轉頭聞下嗰隻手，個BB驚又跌親，跌親又大喊，大喊個呀媽又鬧人哋啲狗

有個主人唔抵得就話：「依個係狗公園，唔係兒童遊樂場，你喺兒童遊樂場見到狗都唔歡迎狗啦，佢哋真係冇性㗎」

個媽媽不甘示弱話：「冇性咪人道毀滅囉，總之你隻狗如果整親佢，我就報警叫漁農署人道毀滅佢」

……聽到依度，我都抱走我隻狗去大狗區玩算，不過真心希望各位無狗嘅媽媽帶BB去狗公園要睇緊，要明白狗狗玩起上嚟好癲㗎，整親大家都唔開心

BB緊係樓下公園好玩啲，但中意狗狗又唔養得嘅話，咪去做下狗義工囉?

圖片來源@Nono
讀者投稿@Nono