#ParentLicenses1698
因為我父母認為老咗先會病，無買保險呢個習慣，佢哋只有「病咗咪靠政府」呢啲概念；而我自知自己能力有限，我都係連保險都無咩買過
講到自己，自問自己係從來無諗過會病，無諗過會連續生兩個小朋友，但其實已經係一個自第二個小朋友出世後診斷出癌症，而且發現癌症已經擴散達第四期嘅未婚女性
我另一半從來都無諗過同我結婚，甚至到我懷孕，佢都無同我父母認真許下過任何承諾，只係問過需唔需要俾下禮金，就為咗個小朋友出世紙要跟佢姓。最後無俾到禮金，因為我屋企係希望佢將錢用落小朋友度。佢已經開聲表明唔認為一紙婚書可以證明永恆，我第二胎懷孕後期，佢仲親口喺街度講我唔係佢心目中理想對象
懷孕前，我哋相識咗兩年多，雙方都經歷過失戀而互相扶持過。佢屋企人一直都催佢成家立室，因此我哋突然由知己變成情侶，再同一年做埋父母，看似幸福，其實當中磨擦、爭執真係數之不盡
我覺得坐月都喊足30日嘅我係一位失敗母親，因為疫情關係，加上我生完後需要做化療，孕婦情緒起伏好大，抱歉我的兩個小朋友連滿月酒都唔可以擺到，希望你哋將來原諒媽咪
準父親可以不聞不問，有陣時問多兩句，佢會一句覆埋嚟：「小姐我都要返工㗎！」或者係「你直接話我知你想點，唔好要我估啦！」但以前我哋其實日日講電話，大家轉咗工變咗send短訊，可能工作全日我唔搵佢，佢唔會主動打俾我，都唔好講關心同問侯
懷孕期間仲要分開住，準爸爸話：「唔識照顧你，你都係留喺你媽咪度啦」
恨到佢咁啱過嚟陪我，我想食嘢，佢又會同我講：「你咁怕肥，買返嚟你又唔食，早啲休息啦，聽日仲要返工」
其實每一次爭執真係唔係故意專登等人去氹、去錫，但係認真想問下各位孕婦，真係可以不聞不問，而自己可以開開心心每一日過日子？至少我唔得
我對父母選擇報喜不報憂，即使佢唔會返我娘家食飯做節都好，我都會做足準備當佢送嘅；而佢屋企做節食飯，我唔敢亂買嘢上去，因為試過幾次佢哋唔用擺喺度鋪塵。我屋企人比較傳統，我媽成日話：「將就下，而家先走？如果而家先自己一個人，將來會好慘」
但我已經受不了準爸爸每次爭吵都叫佢屋企人代佢做傳聲筒，但最後我選擇唔提出，我連佢加班都要靠佢屋企人通知，仲要補一句：「佢無同你講咩？」
我喺佢收工時間仲要預埋佢唔接電話，試過早咗打，佢會話有老闆喺度講電話就cut線或者miss call，我無勇氣奪命追魂call，因為肯定之後有說話聽
我唔知道自己點樣捱過呢3年，大家都不停埋怨大家，唔理大家感受。零包容同計較的生活真係人生第一次，現在諗返起過去總總，我捱過咗化療，亦都自己入院做手術，自己出院，辛苦工人幫忙照顧兩個咁細的小朋友
我好想多謝我的工人姐姐，多謝你不嫌棄，當我失禁大小二便，你仍然扶住我走路。雖唔識睇中文字，但都願意為我食唔落嘢去買我鍾意的嘢俾我食。原來揀男朋友眼光唔好唔緊要，請到一個好的姐姐，又肯幫我照顧兩個初生，仲肯喺我病嗰陣不離不棄，多謝妳。所以我離開第一時間係諗點樣可以帶埋姐姐走，驚姐姐俾佢屋企勞役又唔俾休息
最後我想多謝小朋友爸爸，多謝你用一句「我要返工」「我要做嘢」，多謝你每次爭吵後都搵你屋企人同我講數，更多謝我朋友幫我全程聽佢哋講數，保障我唔需要再面對佢哋全家收留，支持同幫忙，感激當我提出離開的時候，你哋討論各留一個，或者諗埋打官司的勝算率，當晚只要求爭取最多最長的探望機會
總總事情令我下定決心，安心搬走，再重新努力搵錢養小朋友，成立教育基金，去買保險。亦都多謝你同你屋企人過去一年，每一次都淨係講漂亮說話，但沒有實行過任何行動，驅使我幫小朋友儲起啲錢（最少5位數中位，可能太少錢買唔到啲咩，市面平有平買嘅，幾十蚊到幾百蚊都有）喺佢哋自己戶口，但我唔會拎去買保險、教育基金或者其他保障小朋友的事
各位有小朋友的媽媽，唔知你哋會唔會同我一樣，我唔建議一對感情好的小朋友分開，我會深思熟慮去諗點樣做對小朋友係最好、可以為對小朋友付出啲咩嘢，而唔係問咗可以拎啲咩嘢先，我要搵多啲錢平衡開支
多謝你一家人令我決心發奮圖強，努力賺錢工作、投資、做生意，希望呢個post出的時候我同工人姐姐加對小朋友有一個好嘅新開始，同埋已經習慣新環境，期望小朋友健康平安就足夠
每次都話我小事化大，話我唱衰佢，我決定post上嚟睇下我係咪真係太衰。錢方面，由懷孕到小朋友的頭一年成長都係自費的單親媽媽，連癌症治療都係自己獨力支付。我拎過你哋屋企家族的錢，想我好似抬唔起頭做人，但明明係你自己開聲要我袋，因為你良心過意唔去，話叫我養病俾我旁身，我唔夠半年已經全數連本帶利入返你戶口！
我本身都打算退還所有佢送俾我的東西，包括佢話佢有份俾錢嘅戒指之類，但相識到而家5年時間，我收嘅禮物5隻手指數得晒，我都唔知點可以點還，生日收零食包應該過晒期或者都食咗，係咪應該要買返全新歸還？
打出嚟就係為咗喺將來我小朋友自己識睇的時候，佢哋會去自己理解分析，希望將來對小朋友睇到後會支持我今日呢個決定！
圖片來源@MV – 趙頌茹《 發奮 》
文章來源@couple.murmur授權轉載
