#ParentLicenses1697

偶然間知道一個朋友有咗BB，我以為佢終於飛咗個前男友，守得雲開見月明有個幸福人生，點知原來個肚係前男朋友嘅

點解大家都咁唔鍾意佢男朋友？咪又係因為佢做咗10個男人9個都會做嘅嘢——同我朋友一齊6年來偷食次數手指加腳指都數唔晒。次次都被我朋友揭發，而佢又次次都原諒呢個男人

有次離譜到趁我朋友唔喺屋企時，佢帶其他女仔上屋企，即使係捉姦在床，我朋友都可以原諒佢。自此，我一直都覺得我朋友係聖母嘅化身

咁多年佢都做足避孕措施，我以為佢係咪意外有咗，但佢竟然答我係計劃之內，只因佢男朋友一句話：「已經玩夠，想生BB玩」

喺我朋友懷孕期間，佢男朋友都冇顧慮過佢有咗BB，依然喺佢旁邊食煙，甚至連男朋友嘅屋企人嚟佢屋企都照樣室內吸煙……

點解？因為連我朋友自己都食埋一份！

佢一路話：「好內疚，驚BB身體有事」但係一直冇去戒煙，每日至少食一包，但係飲食方面又好注重㗎喎，知道唔食雪糕、唔食生嘢

我問佢：「係咪打算第時喺BB隔離一路餵奶一路食？」

佢話：「唔會，最可能係男朋友先會咁做」

我話：「其實你哋自己都未照顧得掂自己，做乜仲要去生B？你男友日日夜夜都掛住打機，你真係覺得生咗出嚟佢肯幫手湊？！」

佢話：「因為身邊個個人都已經生咗，同埋請咗工人姐姐，到時真係搞唔掂就俾佢湊」

我真係完全想像唔到兩個20歲頭，日日玩到日夜顛倒，做人不務正業，生活咁唔健康嘅人，究竟點樣做人父母？！到時又係可憐咗個小朋友

生仔幾時真係可以立法要考牌？

圖片來源@古惑仔
讀者投稿@無眼睇小姐