#ParentLicenses1691

朋友係家庭主婦，我稱之為「A」

Day 1
A老公因為喉嚨痛，所以做快測，結果陽性；A隨即同兩個仔一齊做快測，當時係陰性

我知道A同佢媽媽住得好近，經常都會帶埋個仔返娘家食飯，幫佢哋買嘢都唔會好遠，算方便。因此當我得悉情況後就叫A：「唔好出街啦，有咩就叫其他親戚買俾你哋」

A嘅爸媽就幫A配藥，又排咩蓮花藥，又搶物資，點知A竟然帶埋兩個仔出去撩鼻！我哋幾個朋友都勁無奈

Day 2
A同兩個仔收到撩鼻結果都係陰性，A就問：「好唔好即刻帶個細仔去打針？」（A細仔讀小一）

朋友group緊係叫A：「唔好，因為確診都要康復後一段時間再打」

朋友們都覺得，其實個老公中，都9成全家中啦，當時A好勞氣咁講：「咁而家未中吖嘛！」

明白嘅，都冇咩嘢，做媽媽會好擔心同有憢悻心態，再同A解釋：「要病毒量高先驗到，不如再等下先，唔好急住打」

以為勸停咗佢，未幾再收到A update。A都開始有喉嚨痛，佢竟然叫咗個大仔帶埋細仔去A媽媽度，我哋班朋友O晒嘴，但都米已成炊，唯有叮囑A提醒媽媽做好消毒，然而A媽媽都係好普通的老人家，真係做到嗎？

Day 3
中午時分，發現個細仔發燒，A媽媽又帶兩個仔返返去自己屋企

佢哋兩家人都有keep住做快測，陰性就當自己冇事，照周圍去買嘢，又去撩鼻……其實可唔可以都諗下自己做嘅事合唔合理？

況且A嘅父母年紀都唔細，都六十幾歲，自己都做父母，既然識得擔心自己小朋友，點解又冇諗埋自己父母呢？

生仔冇牌考，但最好有智商

圖片來源@家有喜事
讀者投稿@冇牌港女
提交時間：2022/3/4 下午1:00