#ParentLicenses1688

見到有一名媽媽投稿，訴說老師投訴小朋友上網課不專心，令我諗起自己小朋友就讀嘅學校都有唔少呢類家長

喺假期期間，學校希望家長可以同小朋友一齊學習，一齊做功課，其中一份係專題報告，而其他都係好輕鬆嘅功課，例如係簡單嘅閱讀報告之類

雖然創作型功課比例較多，但總數都係4-5樣咁上下。由於只係一年級嘅關係，都唔需要寫勁多嘢。喺假期過咗一半嘅時候，有部份家長表示已經完成晒或者接近尾聲

到假期完嘅前兩日，突然有家長投訴，佢話功課太創作性，又要家長搵資料，可唔可以同學校反映俾啲小朋友可以獨自完成嘅功課？又係話自己要返工無時間，趕唔切完成；之後仲有一堆家長附和，又提出好多新嘢唔識搞之類嘅原因

負責人講咗一句：「我會幫你反映，但家長都要知道，功課唔係最後幾日先做，愛與陪伴小朋友成長學習都係好重要」

之後所有人就收晒聲

當時我就諗：「無時間又生小朋友，要生又唔想理，成個波俾晒學校，唔講仲以為個小朋友係學校生。世界上都多雙職父母或單親，點解有啲可以親身同小朋友做功課，有啲又唔得？」

可能會有人反駁：「咁有啲返夜點湊到？」甚至單親：「唔使搵食啊！？」

我覺得一個成年人係可以平衡自己嘅生活同時負上自己應該有嘅責任。唔係因為太累，要搵錢，無時間，有壓力而放棄作為父母或其他應該負嘅責任

人生所有嘢都係一個選擇，而你選擇咗工作？金錢？升職機會？休息？父母？理想？定係小朋友作為你嘅第一順位？

讀者投稿@無錢唔敢生