#ParentLicenses1679 #投稿者回應

我係之前 #ParentLicenses1679 嘅樓主，見到好多人問我嘅問題，其實我都好想一一回應

1）第9個人的確係姐姐

2）有關於我妹夫嘅：首先係佢掉入廚房嘅廁紙，的而且確係佢大完便後擦屁股嘅；另外係我一家連我阿媽食飯嘅時候，佢喺旁邊吐口水做檢測

3）我屋企係大公屋，所以有三間房同大廳

4）而好多人問，點解兩個女兒結咗婚，都仲要喺屋企住？咁就要由之前講起，其實我都有啲心灰……

當時我好細個，啱啱只係考完會考就搬出嚟住，直至差唔多30歲先搬返嚟。返嚟屋企之後，我覺得虧欠兩老太多，所以只係俾家用，但冇理會屋企嘅事情

其實我仲有個家姐，佢已經嫁咗，姨甥兩歲左右，因姐夫長期不在香港，所以都喺屋企住；而當時我妹大肚六個月，亦都同老公搬返嚟等生

我父母比較傳統，覺得女兒一齊住，好比大家庭，齊齊整整會開心啲，又有照應；加上佢兩個都有BB，我媽非常開心湊孫，更加諗住一家人冇所謂，可惜事情總是願違

當我妹差唔多生嘅時候，有一日我家姐唔喺度，唔記得BB做咗乜嘢令我妹夫覺得佢曳，我妹夫竟然一巴掌打落我姨甥度。見狀，我即時抱起BB，再質問我妹夫。我妹夫講佢係代我家姐同姐夫教我姨甥，但係我都覺得佢太過分

後來，經過三個月左右，我家姐同姨甥就搬走咗啦（連幼稚園都即時轉校）。之後我妹同妹夫都買咗居屋，公屋住戶已經剔除咗佢哋嘅名，但佢哋依然喺度住

喺同一時期，我亦都有咗小朋友同結婚。當時我以為我姨甥讀幼稚園嘅時候，妹夫一家佢哋會搬走（一來夫家有屋住，二來佢哋亦有間居屋），另外我老公嗰邊亦唔夠地方俾我哋住，諗到反正間屋有空間，所以我哋諗住留低照顧老人家，誰知惡夢就開始……

我妹同妹夫由6:30到8:30都會輪流霸廁所，老人家有時早上急起上嚟會用小朋友痰罐去解決，咁樣過唔過份？

佢哋喺屋企食飯必定要煮一碟肉，菜佢哋唔係好食，一定唔食隔夜餸

早上開大沖涼，夜晚再要沖涼，每日都洗一套衫，夏天冷氣開足（如果喺屋企）

俾幾千蚊家用就使到我阿媽盡，三不五時叫我阿媽帶我妹個仔去補習，但係佢嘅每日都唔同

呢啲種種行為我阿媽都逆來順受，亦都唔會話佢哋，而且我阿媽又係重男輕女，不停買嘢食俾我妹個仔。之前我都唔介意，但慢慢生活上嘅磨擦令到我都開始有啲不滿，甚至乎我老公亦都覺得佢哋離譜

前兩日就係因為我媽煮飯俾我姨甥食，但係竟然冇理會我女同工人食乜，繼而我爆發咗……其實我都好想孝順我阿爸阿媽，但係我阿媽嘅偏心令到妹夫一家人肆無忌憚咁喺屋企橫行霸道，唔尊重人，令我同老公都覺得佢哋係有心想趕埋我哋走

我同阿媽嘈過，我阿媽話佢甘願俾我妹佢哋喺度住，所以我都唔知應該點好。佢哋嘅賴死唔走得到我阿媽嘅批准，而我就要喺度同佢哋面阻阻，最緊要係我媽都係偏心佢哋，令到我更加難過。我都諗過同我女除名再抽公屋，但係又唔係一時三刻就有，所以都好為難

依家搞到自己好似日日做緊家族榮耀咁，真係好煩！究竟有冇一個兩全其美嘅解決方法？有咩方法可以大結局呢？

圖片來源@呆佬拜壽
讀者投稿@火星人