#ParentLicenses1679

啱啱睇咗貴群組上載一段有關同事之間抗疫嘅文章，令我有感而發都分享吓自己感受

先講少少基本背景，我係住喺公屋，屋企一家九口：爸爸媽媽（70歲），我和丈夫及女兒（女3歲半），我妹和妹夫及其兒子。其實我與我妹一家已經反目，但由於好多原因，依然同一屋簷下

當中尤以我妹夫嘅性格令我與我老公都勁反感。我妹夫係一名看似乾淨，但實質邋遢的人，而且脾氣亦很大，目中無人

最近喺年初二食開年飯時，妹夫當在家中所有長輩面前訓斥我妹；而我妹又好似委曲求全咁，總之喺我眼中覺得好詭異

再講開「表面乾淨實質邋遢」，例子多不勝數

1）以前去廁所開大，佢會用濕紙巾抹，跟住沖涼，但濕紙巾就掉落廚房垃圾桶

2）如果着羽絨返工，收工之後返到屋企會先洗手，再出門口玄關位除低羽絨不停揚

3）教佢個仔：對住人嘅時候咳要揞住嘴；自己咳就可以隨便擘開個口；食飯時，會對住飯餸打嗝一至兩次

4）出街返到屋企，盡可能佢會第一時間沖涼，但係返嚟所除低嘅襪唔止一次放喺沙發上

仲有其他生活上嘅問題都令我倆對佢好反感

事件發生喺初五，我妹同姨甥唔返嚟瞓，而因星期一要上班嘅妹夫就自己一個返咗嚟，而佢亦都買咗盒飯返嚟食

當時我一家同我媽啱啱開始食晚飯，佢洗完手之後就喺食飯枱旁邊開張小茶几坐低，跟手竟然攞盒自己檢測試劑出嚟扯痰做檢測

我即刻出聲話佢，但佢無動於衷，之後我老公，甚至乎我媽都有開聲制止佢

直到佢將口水放入檢測紙等結果，佢先將所有嘢攞返入佢間房，跟住就出嚟澄清話自己盒檢測劑喺藥房買嘅並非喺政府攞

但其實我哋介意嘅並唔係盒試劑到底喺政府嘅定喺藥房嘅，問題係旁邊四個人食緊飯，點解你可以咁樣吐口水，而且你覺得一啲問題都冇？連家中最大嘅長輩，即係我阿媽，都有開聲叫你返房做，但你覺得呢件好似好少嘅事咁？！

當時我好嬲，即刻拍枱，跟住問佢做乜撚嘢？之後佢回我一句：檢測結果呈現陰性，如果我哋一家咁怕死，可以唔好出街

就算件事啱定唔啱都好，係咪應該都要顧及家中長輩或其他人感受？而且人哋食飯，你喺旁邊吐口水，唔通你真係覺得呢啲係無問題？你咁算尊重嗎？

圖片來源@家有喜事1992
讀者投稿@火星人