#ParentLicenses1669

前幾日睇到表妹呻22歲仲俾啊媽收走利是，好無奈。雖然屋企環境比較差，但又真係唔爭在嗰幾舊水，不過就令我想起童年往事

父母喺我五歲嗰陣講過，喺我返小一時，就可以自己袋利是。真係到我小一，我第一次可以擁有自己嘅利是時，我同阿妹超級開心，雖然只得260蚊，但對於我來講係巨款，直情要抱住啲利是瞓覺

年初二，爸爸就話：「我要打麻雀，唔夠本金，你哋借俾我，到時還嚟300蚊齊頭俾你哋」

咁我都好猶豫，佢到下晝又問咗我兩次，最後我都借俾佢，但我金牛座嘅阿妹就死都唔肯，跟住我就好愕然地聽到我爸係咁鬧佢

爸：「冇鬼用，而家幾舊水都唔俾我，以後仲會養我？咁嘅女留嚟都冇用，你都唔使去讀書啦！」

我妹又真係好硬頸：「你把口咁衰，輸一世啦你」

後來我妹就離家出走去咗婆婆屋企

到第二日，我問我爸攞返我利是錢，佢就開始鬧我：「幾百蚊都要同啊爸攞返，你讀書唔使錢呀，你食嘅、住嘅、著嘅，唔係老豆嘅錢呀？生女有乜用呀？」

我呆咗望住佢：「你尋日唔係咁講喔？」

我爸就好晦氣咁走咗出去

我阿媽話：「呢件事教精你兩件事，一、男人把口信唔得，就算係你老豆；二、唔好借錢俾人，除非你預咗收得返」

我又呆咗：「阿媽，你咁都得？」

往後幾年，爸爸都係咁用不同藉口呃走我哋利是錢……至少係呃啦，唔係搶啦，我妹依然唔俾，我就為咗和氣生財都係俾佢。直到我中一，我爸先唔好意思再呃走

宜家我仔得三歲，我每年都同佢一起拆利是，一起數錢，一起存入我同BB嘅聯名戶口。可能係因為細個嘅遺憾，我兩個妹每年每人都俾5000（10封500蚊利是）俾小朋友開心，加埋其他親戚俾嘅利是，相信等佢大個應該都有二十零萬利是基金

不過，我唔知佢大個少少時，會不會覺得媽媽搶走佢嘅利是，定係等佢大個少少後俾一小部分佢，而大頭就存起來呢？

圖片來源@行運一條龍
讀者投稿@無利是的利是狂魔