#ParentLicenses1657

而家所有學生都要上網課，唔使返學，反觀老師有冇得在家工作就真係間間學校都唔同！

我唔知啲家長係咪以為停止面授課，就等於學校唔會有人，個個老師都在家工作，竟然有人投訴學校做咩打鐘

話說，我教嗰間學校喺正幢公屋對面，住嗰頭嘅人大多數都會聽到學校入面啲聲。投訴少不免，不過多數都係因有大型活動，例如運動會、畢業典禮等等，多數投訴音響聲浪太大，但一般上堂時間都冇收到投訴

因為我學校並冇實行在家工作，所以我哋老師都係要返學校上zoom，對於老師嚟講，一切都同上實體課安排冇分別，課堂鐘亦照打，因為方便老師轉堂；唔同嘅只不過係冇學生

不過喺前日，學校收到電話，內容主旨係對面層樓有人投訴：「學校停緊課做咩仲打鐘？嘈住我個女上zoom喎！」

書記同事本身都好有耐性咁解釋返：「仲有老師喺學校上緊堂」

個解釋仲係令投訴人好唔滿意，就話「咩而家停課，做咩仲開學校呀」「浪費電力呀」等等，最後甚至話要告上教育局

我聽到真係黑人問號！

第一、而家唔係「停課」，只係冇得返學上堂，最無稽嘅係你自己都識講個女要上zoom

第二、教育局規定咗學校要保持開放，為咗照顧不能在家zoom的學生。學生唔使返學，係唔代表老師都唔使，更加唔代表學校唔使開；你有能力照顧小朋友，都唔代表人哋都有！

第三、個鐘聲音量從來冇調過，一直冇收到投訴，得你一個投訴會唔會係你問題？

第四、得你個女要上堂，其他人唔使？

第五、學校個鐘唔只係俾學生聽，老師都要聽，萬一上堂over run咗邊個知？

我唔係幫學校，但投訴都要有理。一直發生緊嘅事，從來冇人覺得有問題，你而家先發現係有問題，會唔會反而係你問題？我唔知個家長係咪新搬嚟而唔習慣，如果你覺得嘈的話，不如你搬去沙頭角！

順便一提，我支持你向教育局投訴，話唔定教育局會宣布埋老師都要在家工作

圖片來源@古惑仔3之隻手遮天
讀者投稿@學校老師