#ParentLicenses1654

我係一個part time教琴老師，我無刻意宣傳收生，只係喺屋苑會所貼咗張留言話我教琴，有興趣就聯絡

近日就有一個家長message我話想幫小朋友報學琴，咁我問基本資料，例如「小朋友幾大個」「有無學過琴」「係咪學開想轉老師」等等……然而對方家長就只覆我「無學過」就完

我追問返家長：「幾多歲？」

家長：「關幾多歲咩事？」

其實嗰下我心諗：問你就答啦……不過我都解釋返俾佢知

我：「如果小朋友太細嘅，咁我要準備返適合佢嘅進度表同教授方法，同埋睇下佢嘅年紀適唔適合學琴，因為我之前試過有兩歲嘅小朋友家長問過，咁兩歲既手指都未適合彈琴，所以想了解多少少先」

我留意到家長一路打字，起碼成30秒都未出現個message，我都覺得瀨瀨地嘢

家長最後個message內容大約都係想講：「適唔適合彈琴係由家長衡量同決定，老師只係負責收錢同教，唔到你哋老師話事」

我：「??‍♀️??‍♀️」

講真，我呢份只係part time工作，再加上我而家有成10個學生要教，已經幾困身，其實我唔收你都無所謂

我就同佢講：「嗯！明白嘅，唔好意思，我教學都有我嘅方向，咁我諗我都唔浪費大家時間，唔好意思，我諗我幫唔到你，謝謝！」

家長覆咗我一句：「我未見過學琴都要問咁多嘢」

我之後就無再覆佢

大約過咗一個星期左右，我又收到另一個message：「你好！想幫我個6歲小朋友報琴」

我問晒我要問嘅嘢就收咗呢個學生，同埋約好時間嚟我度上堂

第一堂，家長同小朋友上嚟我屋企，我去開門，一開門我都未講得切叫佢哋除鞋，個小朋友就衝咗入黎，之後衝咗上張琴櫈度，而呀家長就慢慢除緊鞋

我見家長無理個小朋友，我就同個小朋友講：「小朋友，過嚟除咗鞋洗咗手先」

同一時間，我屋企個姐姐見到咁，就拎咗地拖出嚟拖返個地，呀家長無唔好意思之餘，仲有少少皺眉頭

我無理個家長，只安排佢喺梳化坐，然後就叫小朋友坐去琴嗰邊開始上堂

上咗5分鐘左右，個家長就開始行埋嚟我哋後面睇，我依然都無特登理佢

未幾，家長開始有嘢問……
「點解上咗咁耐，連一個音都未俾佢彈過嘅？」
「點解你無琴書俾佢嘅？」
「點解你唔開個拍子機嘅？」

我心情?????：「不如上完呢堂我再同你講呀？」

直到落堂，我：「媽媽，今日小朋友上完㗎啦，因為小朋友未學過琴，要先教咗基本嘢先，所以未咁快彈到歌，同未需要睇琴書同用拍子機住，我哋下堂再見啦」

呢個學生中中地啦，唔係特別叻，又唔係特別慢，上咗3堂後，佢彈到琴書嘅頭一首歌，但由於都唔係好出名嘅歌，基本上咁初級都唔會係啲咩歌

家長又開始有嘢問……
「幾時先會彈到有人識嘅歌？」
「幾時先可以考級？」
「幾時先可以自彈自唱？」

我心情再次??????

我因為真係覺得有啲煩同阻住我哋上堂，我就直接講：「媽媽！我哋都上咗幾堂啦，下次小朋友可以試下自己上堂，夠鐘你再嚟接返佢啦，我其實所有學生都係咁㗎，咁樣佢哋可以專心啲」

佢突然好大反應：「我都忍你好耐，跟你學琴有寶咩？你特別叻呀？學琴前又咁多嘢問，上堂我睇住又唔得。我都未計你第一堂，你叫你工人拖地，呃咗我3分鐘呀，你而家同佢上多3分鐘，我哋唔學啦，上咗幾堂都彈唔到首似樣嘅歌」

哦～～～原來你係第一次嗰個人??

我：「原來你係第一次send message俾我嗰個人，咁如果我唔叻，你又做咩要換個電話再message我？3分鐘我係唔會教，個地係你個小朋友無除鞋整污糟，我唔收你清潔費，呢堂都免費，你哋請回啦！」

呢件事教訓我以後唔好收新生??‍♀️??‍♀️??‍♀️??‍♀️

圖片來源@My盛Lady
讀者投稿@琴老師

故事源起

肇事者回應

投稿者回覆

投稿者補充