#ParentLicenses1638

臨近新年，我又勾起團年飯事件

這幾年因為疫情，只能在家做節。第一年，在奶奶家叫外賣Pizza，奶奶是同叔仔一家住的；第二年，先生知道亞囡唔鐘意食Pizza，就決定叫奶奶叔仔一家來我家做節

叔仔有個囡囡，細我個囡少少，每當去到奶奶度，我個囡玩親玩具時，叔仔個囡囡都會搶走我囡手上玩緊嘅玩具

每次奶奶都會同我個囡講：「就下妹妹！」

奶奶每次都是這樣，於是由我囡K3那年開始，每次去奶奶度，我都只叫我囡帶書去睇！

團年當晚本來都好地地，小朋友嚟玩，又係個妹妹搶玩具，我奶奶又出聲，叫我個囡就妹妹

亞囡都明白妹妹是客人，所以都遷就佢，但幾次都係搶佢手上嘅玩具，我囡開始顯得唔開心，就自己入房冷靜

妹妹不斷拍門，叫我個囡出嚟，然而叔仔兩公婆由始至終都無出過一聲

我見到妹妹咁激動拍門，我就問妹妹：「咩事？」

妹妹只係講：「我要佢出嚟」

我同妹妹講：「而家姐姐有點唔開心，你俾佢冷靜下」

妹妹好霸道講：「我要佢同我玩」

我囡出嚟時已平靜咗，當亞囡又開始攞玩具玩時，妹妹又搶佢手上玩具，我囡終於忍唔住爆喊

我囡大聲問我：「點解次次都要就佢？！」

這時侯，叔仔老婆開始發癲鬧佢個囡，仲的佢入廁所，大力咁嘭門

同一時間，我抱起亞囡問：「你而家係咪好唔開心呀？」

佢點頭就講：「去佢度又要就佢，嚟到又要就」

我只無奈咁同佢講：「你係咪唔想再就？」

佢答：「係」

我再同佢講：「不如去朋友仔屋企玩一陣，我轉頭接你」

本以為佢唔會，因為我囡比較怕醜，但佢居然講：「好」

於是乎，我送咗亞囡去隔離座朋友仔度。返到屋企後，枱上面飯餸已收拾好晒，但其實我仲未食完，勁無奈！心裡面更開始嬲，老公仲攞飯後生果（士多啤梨）出嚟

這盒士多啤梨比較大粒，所以每人食到一粒，但我一家三口一粒都無得食。我哋每個人都知妹妹同我個囡都鐘意食士多啤梨，當時亦冇人話留俾我個囡，所以我心入面更加嬲到火山爆發

佢哋走咗之後，我勁抦我先生！我先生其實都好嬲，所以自此之後就無再叫過佢哋過嚟食飯！

其實而家坊間有好多教人點教小朋友，我都唔識所以去學

圖片來源@創世紀
讀者投稿@Chris