#ParentLicenses1614

有件事真係過咗咁多年我都耿耿於懷，好自責當時嘅自己冇辦法幫細佬出頭

見到咁多極品家長嘅故事，我都忍唔住投稿——事情嘅源由係我細佬讀小學時俾一個家長欺凌，直至到而家讀中四都仲需要持續見心理醫生

話說，我細佬讀小三左右嘅時候，有一個A好朋友，喺學校會一齊玩，放假亦都會一齊參加活動，甚至周不時會約埋一齊食飯同出去玩，總之就係關於非常好嘅朋友仔

有次跟社區中心出去玩嗰時，我細佬食完飯，然後去同其他小朋友玩；A未食完，見到其他小朋友玩又坐唔定。回程之後，A媽就去同我阿媽投訴話我細佬不知羞恥，搞住佢個仔食飯

我阿媽不嬲唔會為面子亂鬧仔，由於佢冇參與個活動，唔知事發經過，所以走去問社工

事實上，我細佬只係同其他食完嘅小朋友玩，所以社工都係話冇發生啲咁嘅事，仲讚我細佬好乖添

自此之後，A阿媽就開始唔鐘意我細佬，周圍話我細佬曳之類，然後可能佢同個仔講過啲咩啦，後來連A都開始排斥我細佬

去到小五，我細佬身形比較肥，A成日拉大隊圍佢、笑佢肥、話佢臭

我哋嘗試同老師講過，老師有阻止亦都有反映俾A阿媽知，但係A阿媽堅持自己個仔好乖，咁老師都奈佢唔何

然而，最激氣係升中之前嘅事

當時我哋隻貓貓過咗身，A知道之後笑話抵死，我細佬梗係嬲啦。小息嗰時，細佬就攔住A要求佢道歉，但試咗幾次都失敗就放棄咗，返到屋企有講返我哋知話好唔開心

勢估唔到，第二日我哋就收到投訴

A阿媽指控我細佬恐嚇佢個仔，搞到佢有陰影唔敢返學。老師調查過之後話冇咁嘅事，但係最後好似都有叫我細佬道歉，息事寧人

不過，A家長貌似唔係咁滿意個結果，周圍同其他家長講老師唔公道，我哋估佢係希望我細佬要記缺點云云

讀者投稿@唔講啦