#ParentLicenses1598

疫情前做過補習社托管，星期六有班9-14半日特別托管服務，學生對象為5至10歲，而我就係佢哋嘅托管姐姐

通常呢班學生平日放學後就去補習社，星期六若然父母要返工，就會放低佢哋半日，放工來接返

有一個星期六，托管班小朋友食飯，有3個小朋友食焗豬扒飯，當中有一個讀小三嘅肥仔見到盒飯唔肯食。細問之下唔肯食嘅原因，係因為冇人幫佢切豬扒

佢唔該都冇聲就命令我：「你唔切豬扒我點食呀？要唔要我教你做嘢呀？」

再加以威脅：「我投訴你，你就冇嘢做」

在場仲有兩個小朋友，一個K3，一個小一，佢哋都自己識拮住塊豬扒食，我完全諗唔明你肥屍大隻，讀緊小三，我唔幫你切豬扒就唔食飯到底係乜嘢一回事？！

最終我同佢講：「你已經小三，唔係K3，我唔會幫你切豬扒，你唔識食扒，可以剩係食飯」

肥仔最後真係成盒飯唔食，甫一見到佢媽咪嘅時候，肥仔立即投訴我唔俾飯佢食

嗰一刻佢媽咪黑我面，同肥仔講：「我會搵負責人傾吓」

媽咪接咗肥仔時，佢仲拎埋盒飯走

兩日後，補習社負責人同我講：「我會邀請肥仔媽媽過嚟睇CCTV」

然而，肥仔媽媽都係無過嚟，而且之後嘅托管班都再見唔到肥仔，唔知佢學識切豬扒未呢?

讀者投稿@托管姐姐