#ParentLicenses1584

有一間芭蕾舞學校，其中一名老師非常無愛心，會鬧小朋友，搞針對，但又會喺家長面前扮好錫小朋友，係一個滿口謊言嘅老師！

我B女就喺呢間芭蕾舞學校學跳。有日湊佢放學時，平時好動活潑嘅佢無出聲，面帶不悅，但老師喺我面前勁讚：「B女又乖又可愛，今堂表演好好」

返到屋企後，B女模仿老師喺堂上鬧佢，原來老師曾用手指住B女，話佢蠢同無用，話佢肥妹好肥醜怪。

B女好叻，佢答返老師話自己唔醜怪，媽咪同婆婆話我靚女

之後老師指責B女駁咀

B女喊咗出嚟，一直叫媽媽。老師非但無安撫B女，仲叫佢收聲，仲話：「你咁醜樣，你呀媽只會信我而唔會信你，你講俾佢聽都無用」

我聽完之後勁心痛——點解要完全踐踏人哋嘅自尊心同自信，而且只係一個5歲幼稚園嘅小朋友？之後我又嬲——竟然喺我面前做雙面人讚美我B女？

更可悲嘅係得返嚟嘅comments，就係我送得個囡學跳舞就預咗要受苦，就預咗要俾人鬧，怕小朋友玻璃心就唔好俾佢上堂云云

我無預計一個幼稚園程度嘅興趣班原來係要俾小朋友去受苦！我畀我B女學跳，係想佢開心，培養興趣。而家好後悔我無盡力去保護我B女！該老師亦無任何歉意！你無愛心唔好再害人教班喇！

圖片來源@魷魚遊戲
讀者投稿@小豬媽