#ParentLicenses1563

我喺Learning Centre做Reception嘅，見盡唔少奇人奇事——特別係已為人父母嘅成人，但唔識咩叫尊重，以為畀嗰少少錢就可以為所欲為

話說早排有位已經屬中學年紀嘅新生學員前來報名。於報名前，我哋都有同佢講《學員須知》，話佢知啲規矩，用意係想帶出一個信息，就係唔好經常調動及請假之類

點知上咗幾堂之後，佢阿媽就開始頻繁地調動啲課堂時間

開頭我哋都包容佢，但都有勸喻避免調動：「其實導師的時間不是全天候有空及不是全天候有class喺度等你一個」

其中一次最奇怪嘅請假原因，係因為佢個仔間學校有活動早放學，所以想改早啲時間上堂，方便佢個仔放學後就直接過來centre上完堂返屋企，唔洗沖多次涼??

明白，喺疫情期間大家都注重衛生，我哋幫到其實都盡量想幫佢嘅，但好可惜佢要求嘅時段冇佢個仔嘅class

我哋如實同個阿媽講返，但佢就收咗線，就以為佢唔改啦。點知到第二日，佢契而不捨地又問其他日子嘅時間，但個阿媽問親嘅時間都唔啱，佢又要堅持佢要求嘅時間

我心諗：「間centre你開㗎？得你一個學生咩？你要咩時間就咩時間，為咗沖個涼咁大費周章？！」

最後傾咗用可以沖多個涼的時間去夾咗個新時間遷就佢（哋）

話說回頭，點解我要強調新生學員係中學年齡呢？佢頻繁地改動時間緊係要夾返上堂時間啦，起初主要都係同佢阿媽約時間，但約完個阿媽又話要問返佢個仔。既然見呢個阿媽咁重視佢個仔先，我哋約補堂時間又試下問咗阿仔先啦，點知阿仔又話要問返阿媽先

其實約一個補堂都要問來問去，請問係咪覺得我哋淨係照顧你一個學生？！係咪以為我哋好得閒？！

讀者投稿@小李班怪獸