#ParentLicenses1537

一路睇大家發表「生仔要考牌」嘅文章就睇得多，估唔到今次係自己發表

自從生咗BB，放完產假後嘅每一個工作天收工之後，都會帶埋BB去某間大型商場新裝修好咗嘅育嬰室泵奶同處理最後清潔及消毒工作

由於間育嬰室非常大，設有三間獨立房間及兩個換片嘅地方，即係換片同餵/泵奶嘅地方係完全分開的。房內無洗手設備，要用就要出房到換片位置附近嘅洗手盆洗手

基本上我晚晚都跟BB留喺育嬰室至少1.5小時左右，完晒所有育嬰工作才離開

今晚我如常例行公事，當我準備想去洗手，一開門之際，見到一個媽媽，佢帶着一個目測大概只有4-5歲嘅小朋友（女）同一個6-8個大嘅BB，佢竟然當住兩個小朋友面前，用一個大嘅zip-zig透明膠袋，將洗手盆隔離嘅洗手液，一唧一唧咁將洗手液唧落個zip-zig袋度準備偷走！

我哋四目相投，個媽媽即刻縮開個袋唔繼續唧，隨即帶埋BB轉身入另一間餵奶房同閂門匿埋！

因為我知道中間間房有另一個媽媽同BB喺裡面餵奶，為了唔想嚇親大家嘅BB，所以我一路扮若無其事咁繼續洗手後入返房閂埋門，但留返個門隙繼續觀察

個媽媽聽到閂門聲就即刻出返嚟，我聽到個小朋友問佢媽媽：「頭先點解唔繼續攞嘅？」

媽媽覆個小朋友：「頭先有人喺度嘛，有人喺度唔攞得！」

個媽媽一邊繼續偷洗手液，一邊同佢個小朋友咁講，直到將洗手液裝滿成個袋為止

那位媽媽偷嘅途中，中間房嘅媽媽走咗出嚟幫BB換片嗰陣，那個媽媽仲要背住換緊片那位媽媽面前繼續喺度偷洗手液！

當我見到那位偷嘢嘅媽媽離開了育嬰室嘅下一秒，我即時紀錄佢哋三個離開嘅時間，及後我走出間房，同時打電話去商場客戶服務部，請商場保安同事幫忙及了解事件

商場保安聽後亦決定了會翻查今晚位於育嬰室大門外嘅閉路電視，唔排除會鎖定目標，等時機成熟再人贓並獲

坦白講，就算一個人幾窮都好，絕對唔應該喺自己小朋友面前做偷竊這個行為，仲要跟小朋友表達「偷竊係正確」呢個訊息！無論所偷嘅物品價值同數量有多寡，貧窮絕對不是一個用嚟做偷竊行為的藉口！

我真係無法想像得到將來呢兩個小朋友長大成人之後會變成點，但佢哋嘅媽媽今晚做嘅所作所為真係會影響佢哋非常深遠！

讀者投稿@在職媽媽