生化武器

#ParentLicenses2848

近日因孩子腸胃不適,故入住了兒童病房的腸道病區

於凌晨時分,突入住咗位一歲左右嘅「生化武器」。我之所以稱呼佢為「生化武器」,係因為小朋友嘅病徵又屙又嘔,但唔緊要,我哋個病房全部都係腸胃病我體諒嘅,但問題係陪同佢入完嗰位婆婆,佢就係令到呢位小朋友成為生化武器嘅主要原因

明知小朋友既屙又嘔,正常就唔應該抱住佢喺病房度行嚟行去,我都明小朋友唔舒服係特別黐身,但你喺度行嚟行去,會增加咗病房內其他人感染到嘅風險

小朋友嘔咗落婆婆身上,竟然直接將啲嘔吐物揈落地,洗完手啲水又係周圍揈。職員提醒佢洗完手可以用抹手紙抹乾,唔好整到周圍濕,佢仲要指責返個職員:「個孫病我都唔想㗎,嘔到我成手都係,都無人嚟幫我!」

已經明知患嘅係腸胃病,婆婆喺短短半個鐘內餵奶餵粥又餵包,結果又係屙同嘔,惟最可怕係我睇住個奶嘴跌落地,佢就咁將個奶嘴拎去水龍頭沖下就算,就隊俾返小朋友啜,真係唔怪得佢又屙又嘔

父母要返工搵食我都明白,但應唔應該了解清楚長輩係咪真係應付得到先呢?個仔係自己生嘅,無論咩情況下作為父母係咪應該有責任照顧返,唔係就咁放低俾長輩呢?雖然我唔認同呢位婆婆做法,但我都明白婆婆係騎虎難下

讀者投稿@生化武器

error:
Exit mobile version