#ParentLicenses2838

近日見到有篇文章講，好多人生仔根本冇諗過小朋友自己想唔想嚟呢個世界。睇完真係心入面有啲唔舒服

我今年20歲，讀緊大學。六年前俾人安排嚟英國讀書。表面理由當然係「為你好前途」，實際就係為移民鋪路。讀boarding school、女校、冇乜娛樂，自己性格又內向，初期真係好難適應。不過總算捱過咗，入到uni

三年前，老母突然話要同細佬先行過嚟定居，阿爸之後匯合。點解突然咁急？因為佢見身邊啲朋友一個一個移民走，自己唔抵得，就逼老豆快啲跟。明明係佢自己想走，四圍卻話俾人知：「個女有情緒問題，所以要陪佢」事實係，佢嚟咗之後，我過得更加艱難，因為成日俾人情緒勒索

屋企經濟支柱一直都係老豆。老母話要佢放棄香港所有嘢跟過嚟團聚，老豆就收晒皮——可是，我知佢真係有把柄俾人揸住，都係小事啫，你哋搞出嚟嘅嘢做咩要我哋啲細路埋單？

以前我老豆都幾開明㗎，可以傾心事，佢會陪我笑，陪我喊。我老母就從來都don’t give a damn。我做得好就應分，唔好就俾佢鬧，有嘢問就話我屎窟鬼。自從移民計劃落實之後，我老豆完全變成我老母嘅應聲蟲，真係好弱雞。我老母一發癲佢就縮，有乜事就一句：「唔關我事，問你阿媽啦」腰骨都冇埋

老母係控制狂，又成日得罪人，所以打唔到工。佢自己做生意十幾年，一路蝕住做，全靠老豆一直貼。講真，冇老豆，老母根本係寄生蟲，除咗生咗我同細佬，真係毫無生產力。但係就因為啲小事，老豆就放棄晒話事權，由佢話晒事

上咗大學之後，老母就一直cut我零用，但係就一邊怪我冇社交、冇朋友，唔識幫自己鋪路。問題係我食都未食得飽。跟住老豆又係嗰句：「係咁㗎喇，有咩問你阿媽啦」老豆呀，錢係你搵㗎，你做咩變成咁㗎？

我三叔三嬸好錫我，我返香港都會跟住佢哋。佢哋好錫我，教識我好多嘢，但又唔係放縱我，有時都管得我幾嚴，但又好合理。佢哋有時會俾錢我，但冇理由要佢哋咁樣做，我始終唔係佢哋仔女，我覺得唔好意思，亦好appreciate

講到唔好意思，我老豆老母就使人唔使本，從來唔會唔好意思。成日叫人喺香港買嘢帶去英國俾佢哋，然後講句多謝就算數。我三嬸去日本公幹，我老母都要佢買嘢俾我帶返嚟。但我老母去親旅行都靜靜雞，好驚其他人咁好似佢哋咁要佢哋買嘢

有時我會諗，我係咪都只係工具人之一？佢哋點使都冇問題，人哋問佢哋攞嘢就要慘被奚落。人哋付出係必然，佢哋付出就要謝主隆恩？

仲未講老母嗰啲PUA同難聽說話……不過算啦。諗起真係好傷心。其實做咩要生我？可能要建立一個好媽媽形象啩。佢哋兩個好proud of 自己好似模範家長咁，實情都係假像。活咗20年，真係一年灰過一年

不過大家唔使擔心，我唔會自尋短見。我死咗，佢哋唔會傷心，只會埋怨我唔感恩，轉頭就唔記得我。我三叔話生命價值係要自己賦予，我應承佢會努力讀書。起碼我知道呢個世界至少有兩個人真心錫我。生我嘅可能冇得問我同唔同意，但有其他人可以令我覺得值得

讀者投稿@齊蔭bb