#ParentLicenses2817

我老母有個強項，為咗自己要拗贏所有嘢，強行屈鳩我

由細到大每當佢被人話，都係會將罪責指向我。而家佢年紀漸大，更嘗試喺同我拗嘅時候，將自己講過嘅說話、做過嘅決定，都會屈係我講我做嘅

就算我鬧返佢，佢都堅持話自己冇屈我。對佢嘅朋友、對我嘅朋友，都可以將一啲我冇做過嘅嘢，強行套落我身上

我嘅抑鬱症就係咁樣屈出嚟，即使停咗藥幾年，見心理輔導幾年，我四十幾歲人一個星期都未必返一次屋企，佢都仍然可以喺一個平凡普通嘅對話裡面無端端屈鳩我

最早嘅記憶係我細佬喺幼稚園做錯嘢見家長，佢捉埋我去，將老師同佢講嘅「要好好教細佬」「唔可以亂發脾氣」等說話，老母一嘢喺細佬同老師面前，將管教責任推落我呢個家姐，指責我冇好好咁教細佬。當時我一頭黑人問號，你個仔你唔識教，指意我呢個只不過係幾歲嘅小學生識教？

最深刻嘅記憶係有一次成家人喺街食完飯，我行後面，一出餐廳第一步我就拗柴，喺餐廳門口同返到屋企後，老母都係咁瘋狂捽我隻腳，愈捽愈痛，愈想喊就愈鬧得勁

直到第二日去睇跌打，醫師就問我係咪被人捽過隻腳嚟，捽傷咗啲筋膜有排醫。我老母企喺醫師後面耍手擰頭迫我答「冇」

醫師問咗我幾次，我剩係識得忍住眼框嘅淚水，就一邊吞咗啲眼淚，把口一邊答「冇」，我當時仲未學「委屈」呢個生字，後來先知呢個就係委屈嘅感覺。老母就繼續話我唔忍得痛，所以眼濕濕

大個咗後我學識唔可以被人屈，惟對住我老母每次還口只會得到更多被佢老屈嘅說話。唉，童年創傷係好可怕

相片來源@正義迴廊
讀者投稿@阿喵