#ParentLicenses2816

我仔因為肺炎入咗公立醫院，喺半夜時分，隔離床嚟左個目測不足5個月大嘅BB，同行有佢目測4-50歲嘅爸爸

其實BB入得院都係好唔舒服，何況呢個BB咁細個，係一定會喊。佢爸爸一開始係有氹，但係就不停咁講：
「你唔好再喊啦！」
「咁你想點啊？」
「唉你真係好煩！」
「唉我唔理你啦！」
「抱你又喊，放低又喊！你仲想點啊？」
「抱咗你好耐啦！仲唔瞓！」

佢嘮嘮叨叨不果，就好大力咁拍落BB個屁股或者張床。佢語氣好惡，好似個BB特登喊、特登唔俾佢休息咁。之後又放返BB落床，由得佢喊，喊到攰瞓覺

第二日朝早爸爸隨即打電話俾媽媽，我唔知內容傾咗啲咩，但只係講咗幾句就已經爆晒粗，叫媽媽自己死過嚟醫院湊BB

同日夜晚，爸爸同媽媽走咗去食飯，去咗差唔多成個鐘，剩底個BB喺度喊到痴肺，聽到都心痛。我想過去睇吓，又怕會俾佢爸爸返嚟見到鬧我多管閑事。幸好間唔時有姑娘嚟氹吓BB，連個姑娘都話：「BB你啲屋企人走晒呀？冇人陪你啊？」

之後有陣時我經過佢哋張床，會見到爸爸坐喺櫈度打機，都唔會理瞓喺張床度喊到甩肺嘅BB。個媽媽同姨媽都對BB好啲，起碼唔會由得佢喊，唔會用啲咁嘅說話鬧佢

其實我想講，佢只不過係一個咁細嘅BB，你唔係期望佢識聽你講嘢呀嘛？你鬧佢又有咩用呢？講真，我自己啱啱生完湊BB嘅時候都好崩潰，但都唔會將啲情緒發洩落個仔度，而且喺BB唔舒服入醫院嘅情況下

我相信佢哋唔係唔愛BB，如果唔係都唔會送BB入醫院，但係個爸爸就真係冇乜耐性對住BB，連佢喊都頂唔順，已經想像到當BB大個咗，佢會有個點樣嘅童年，應該郁啲就會被佢爸爸鬧到痴肺

讀者投稿@惡爸爸