#ParentLicenses2799

事源今日早上帶小朋友去石門上英文班

平時送小朋友入課室後，我會離開食早餐，但今日肚痛唔舒服，就戴好口罩坐在接待處的長橫椅上等

過咗一陣，有位女孩入咗嚟，佢拎住個玩具同我講咗兩聲「唔該」

因為女孩對眼無望住我，又得返「唔該」兩隻字，我最初唔清楚佢係咪對我講，定係佢自言自語，抑或其他，亦唔清楚佢想做乜，就望下及問下職員先（我唔識呢個小朋友梗係唔知佢想點，但職員識佢可能估到）

同一時間，女孩嘅四大長老之二入嚟，講小朋友想拎我個座位去擺佢啲玩具玩。雖然我覺得唔合理但都坐開咗，讓個身位出嚟

點知個婆婆定嫲嫲就開始單打我，不斷俾說話我聽，話我唔肯讓位（明明當時已經讓開咗），又講我唔應該坐喺度，要讓埋剩餘位置，暗示我應該要走出去，直指小朋友向我講咗「唔該」又唔理

痴線，即刻嬲到我彈起身對佢喺開火！我到先，坐先，竟然要被你哋指責，被你哋趕完又趕！？完全係港鐵爭搶關愛座嗰種老了的壞人

真係人善被人欺，之後我唔鬼理繼續坐，兩個老人就繼續喺門口胡說八道。我見個女孩係著住套私幼校服，咁屋企點都收入良好啩，點知成家都無教養。我始終覺得唔方便喺女孩面前當面指責，所以無講啲咩

其實作為照顧者，係咪應該先要教小朋友對人好好表達想法及呢個世界唔係你想點就點？作為長老，係咪就可以咁惡咁自私，要其他人就晒你哋？與其嚟上英文堂，不如先教好品德啦

讀者投稿@嬲到要第一次投稿