#ParentLicenses2769

上學期小朋友返學時，成日被坐隔離個同學T搶嘢、借嘢唔還、整爛啲文具。小朋友都有明確表示啲嘢係自己嘅，希望同學T還返啲嘢俾自己

有一日，小朋友發現唔見咗啲嘢，就同咗老師講，老師遂同全班同學一齊搵，結果就係同學T拎番返出嚟

事發當日有部分家長在場，亦有啲同學回家同各自家長分享呢件事，所以我後來都收到幾位家長私訊我講返件事。其中一位家長就話我知同學T係慣犯，叫我提醒自己小朋友小心啲

其後老師安排同學調位，我都冇再聽到小朋友提起唔見嘢，亦冇再提起同學T。我以為事情已告一段落

直到家長日見到老師，老師就話同學T嘅媽媽唔開心，話我唱佢個女偷嘢，對調位嘅安排更表示不忿，好似顯得佢個女有問題咁。老師提醒我同其他家長溝通時小心啲，費事被人誤會。我立即同老師澄清，係其他家長主動私訊我，同我講件事

我自問都好理性，惟T家長係咪應該聚焦返喺自己小朋友嘅行為上面，而唔係其他家長呢？

其實我小朋友被人搶嘢都有唔開心，但我哋樂觀啲覺得都係學習面對困難嘅機會。委實講，我哋先係受害人，但就被老師「提醒」，我都可以玻璃心覺得老師嘅説話傷害到我㗎喎！

搬弄是非嘅其他家長，祝你哋生活充實一啲，唔好再咁無聊説三道四。另外，同學T嘅媽媽，你咁玻璃心，做人都應該好辛苦，祝你早日解脫

讀者投稿@ A