#ParentLicenses2423

我先為呢篇可能唔太關生仔事嘅文章講對唔住——對於家庭崗位同職責範圍嘅問題上，我抱有好大疑問：點解呢個社會咁偏袒全職媽媽，有冇人會關心下在職爸爸？

本來喺阿仔出世後至一歲都有姐姐湊，然而或因我哋兩公婆都出嚟做嘢，家中經常無人看管，引來第一個姐姐偷嘢，至第二個姐姐玩失蹤重借埋錢，所以我哋對姐姐係好失望，唔敢再請工人。寄望四大長老？但佢哋年紀都好大，所以無謂加重佢哋負擔。最後決定係老婆做全職媽媽，我唯有搵多啲返十二碼

我都知做全職媽媽係辛苦，而個仔特別扭計，但我每日返完十二碼返到屋企，每一日見到嘅景象係——老婆抱住個仔氹瞓覺，瞓著又唔敢放返BB床，飯又冇煮，衫又未洗。結果我每日放工都要執呢啲手尾，又要食外賣

終於有一日我頂唔順，我話：「我日日返到嚟都要做家務，又冇得食住家飯，想我死咩？」

老婆就話：「我湊仔都好辛苦，你都知個仔好扭計，日日晏覺都唔肯自己瞓床，我邊有時間做家務？重要咁痴身要花好多時間陪佢玩」

因沒完沒了嘅鬧交，我有同同事朋友呻。佢哋都叫我睇開啲，有啲就話湊仔重辛苦過返工。講真，我上面都講過日日返十二碼已經辛苦，而且我唔係返寫字樓工，我日日都揸大車兼送貨，返到嚟重要做家務，每日瞓得嗰幾個鐘又要起身返工；家用我已經俾凸，但老婆要做嘅家務煮飯就做唔足。講辛苦都不及我辛苦，在職爸爸都需要關懷。

有排過育嬰院又有請過姐姐，四大長老年紀大湊唔到，我重有咩方法？

讀者投稿@老公